Ka duhdawt mi Christian nu le pa u le nau pawl hmaisabik ah kan biak kan Pathian cu sunlawinak le thangqhat in um ko seh tiah hi thuthangqha a ngaitu pumpak cio nan zaten cibai ka lo buk asi.
Tuih kan ngai thlang dingmi thazaang kan lak tlang dingmi cu ''Christian pawl ih kan nu asi mi Bawinu Mary'' timi a thutlangpi (lole) a thulu ah retin hmuh daan le thei tawk in run sim ka duhmi asi. Duhdawtmi zumtu u le nau le uh,
A pakhatnak ah Nu Mary cu sualhram a nei lo timi asi dingih himi thuhla ah hin ziangtin asiih aum daan kan zoh asile Semtirnak 2:21-24, Sersiamtu Pa Pathian ih leidip in a sersiammi Adam cu amah te lawng um cu a rem ati lo ruangah thaw zet ih a ihthat sung ah a hnakruh pakhat cu a lak ih nunau cu a tuah. Adam cu a hnen a ra ih a hmuh tikah ka ruh in tuahmi ruh, ka titsa in tuahmi titsa, mipa sungin lakmi asi ruangah minu tiin kawh siseh tiah Pa Pathian in ati. Curuangah mipa in a nu le pa tanta in a nupi thawn an kom awk, cutiin titsa khat ah an cang. Cutiin Adam le Eve thuhla cu kan nauhak lai te ihsin theih cio thluh mi rak si ko hman sehla thupi deuhmi ruah a qul ka timi cu - mipa in a nu le pa tanta in a timi zawn te ah hin mipa atimi cu Adam asiih a pa cu sersiamtu Pa Pathian asi ti kan thei. A nu timi teh zoso asi pei? Pathian cu nupi a rak nei dah tile kan rak thei dah fawn si lo. A tanglam vekin run sim vivo awk cu kan qul in ka hmu.
Semtirnak 3:15 Nunau nu thawn ka lo ral awk ter dingih na tefasin tiangin nan ral awk ding. Na lu a lo sutbek dingih nang in a kedil na cuk ding tiah ati. Unau zumtu hrekkhat ih hmuh daan run sim hmaisa sehla nunau nu thawn ka lo ral awk ter ding atimi cu Eve asi ding an ti.
Pakhatnak ah : Eve rak si ngaingai bang sehla Eve cu kan ral setan rulhreng pi thawn rem awk in Pathian ih rak khammi thingrah cu an pek aw mi hman ah lungawi ten an cohlang awk ih a ei zo asi kha. Pathian in an palh mi sualcawkkuan hmanah Adam le Eve le rulhrengpi cu a sangsang ten an tuar dingmi cawhkuan khal pek hai an si zo.
Pahnihnak ah : Acuih nu nau nu cu Evi rak si ngel cel seh la Satan asi mi rul hreng pithawn Pathian in a ralawk ter asi ah cun cuih nu nau nu Evi cu a thiang hlim sal ti asi pei maw? tile a cang thiam fawn si lo, ziang ah tile ca thiang hlim sung ah - Nu nau ih hrin mi sung ah a thiang hlim mi an um thei ding maw? Ps 51:5, "ka suah ih sin mi tha lo ka si ih ka nu ih pum sung ih sin mi sual ka si'' ti in a um fawn tik ah mi nung in hring tu nu hmai sabik Evi ih sual nak cu a thisen sung ah a um ih mi thiang cu asi thei hrim hrim lo ruang ah a tu tiang in sual ih fa kan si ring ring nak cu asi tin saam hla bu ngan tu in a run sim fiang nak as.
Cu ruang ah duh dawt mi zum tu u le nau pawl, kan Bible sung ih a um mi 'satan rul hreng pa' thawn a ral aw ding mi nu nau nu cu rak khih hmuh cia asi ih, nu le pa taan ta in a ti nak kan zoh asi le pa cu sersiam tu Pathian asi kan ti zo bang in, nu ati mi cu Pathian a thiang hlim bang in ziang tin lam a sersiam hlan le a um hlan ih sin a thiang hlim mi nu nau cu a rak um zo asi ti in, in theih ter cia nak a rak si.
Acuih nu nau nu cu mi lai ih mit hmuh in lei tlun ah a tar zo mi Jochine le Anna sung ih sin hrin mi Mary cu asi hrim hrim. Ziang ah tile sersiam tu Pathian in a cuih nu nau nu ati mi Mary cu sual hram nei lo in a thiang hlim ruang ah run dam tu Jesuh hring tu ding ah lam dang zet in a rak hril cia nak cu asi. Acuih Mary cu mi lai taksa, Adam le Evi sung ih sin hrin mi rak si sehla a hrin mi Jesuh khal cu mi lai asi nak in sual fa asi ve ding asi. Rundam tu Jesuh hi thiang hlim thlarau fa asi thei nak cu hring tu Mary le Sersiam tu Pathian cu sual nak nei lo in an thiang hlim ve ve ruang ah asi
Cule Isaiah 7:14, ''A tu ah Bawipa amah rori in khih hmuh nak a lo pek ding. Nu nau pakhat in fa a von ding ih fapa a hring ding, a hmin ah Emanuel tiah an sak ding'' ti ih kan hmuh bang tuk asi le Emanuel ti mi cu Bawipa kan hnen ah a um ti nak asi ih, cuih hring tu nu nau nu cu khua hlan lai ah Adam le Evi a rak sersiam hlan ih nu nau nu a rak timi ci a tuih in run dam tu Bawi Jesuh nu asi thlang ti in fiang ter vurvo nak cu asi.
Mt 1:16, Jacop ih fapa, Mary ih pasal cu Joseph asi. Cuih Mary cu Khrih timi Jesuh ih nu asi. Mt 1:18-25 sung ah kan siar asi le, Mary cu thlarau thiang hlim in fa ka von ti a theih thu hla cu Joseph in a thei tik ah a thin a phang ih, zaan ih a ih that lai a mang ah van cung mi in na thin phang hlah, thlarau thiang hlim fa asi thu le a hmin ah Jesuh ti ih hmin sak ding thu, cule Profet Isaiah ih rak sim cia zo mi nu nau pakhat in fa a von ding ih a hmin ah Emanuel tiih an ko leh ding thu pawl a sim theh hnuah Bawipa van cung mi ih a fial bang in Mary cu a run thit leh nak cu asi.
Cule ziang ruang ah Joseph in Mary cu a run thit ti le, kha mi san lai ah nu nau cu pasal nei lo in nau an nei asi le mi sual bik that ding tlak in an rak ruah mi asi ih lungto in den that ding asi ruang ah a hum him duh nak cu asi. An mah Judah mi pawl ih kutsung ih sin siatsuah ngah lo ding in Nu Mary le a pum sung ih a von mi run dam tu Jesuh cu a run suak ta riai asi. Cu ruang ah Bawi nu Mary cu sual hram nei lo in run dam tu Jesuh ih nu cu asi, kum khua asi.
Duh dawt mi zum tu u le nau le uh, Bawi nu Mary cu Bible hlun sung in khal si seh, Bible thar sung in khal si seh, sual hram pi nei lo in a thianhlim nak thu cu St.Paul ih run ngan mi ca kuat sung ah khal hi tin a um, Rom 8:29-30 sung ah kan zoh asi le Pathian ih a rak hril cia mi pawl cu a dang ten a rak ret cia zo thu le thiam khal a co ter ih Pathian sunloih nak khal Fapa Jesuh le a nu Mary khal in an tawm ve ti nak asi. Kols 1:17,''Khrih cu ziang hmuah hmuah hlan in a rak um zo ih a mah thawn an peh zom awk nak thawng in ziang zongza cu an maih um nak cio an nei.''Cu vek cek ci hi asi, ziang hmuah hmuah hlan in fapa Jesuh a rak um zo asi le Semtirnak sung ih kan siar zo bang tuk in run dam tu Jesuh hring tu a nu khal Adam le Evi ih sual nak ti mi a rak um hlan ih sin rak um zo asi ti, in thei fiang ter sin nak cu asi.
Cule Thuphuan 2:7b, ''Neh tu asi mi hnen ah Pathian hmuan sung ih a kheu mi nun nak thin rah ei thei nak the ka pe ding a ti''. Cu ti vekin St.John ih Patmos ti kulh ih thawng a tlak lai ih a ngan bang tuk asi le, Pathian hmuan ati mi Eden hmuan sung ah thih nak thingkung asi mi Evi rah cu sual nak asi bang tuk in nun nak thingkung a kheu ati mi cu Nu Mary asi ih a rah cu run dam tu Jesuh Khrih hi asi. Tui ni tiang ih kan ei rero mi thiang hlim pumpi cu kumkhua nun nak thing rah sung lawi Jesuh Khrih cu asi. Cu ruangah Eden hmuan a rak sersiam lai ih sin nun nak thingkung Nu Mary a rak um zo asi ah cun, sualnak sung ah tel lo in lamdang ten thlarau in a rak um zo ti khal in thei fiang ter zet asi. Theih ter ka duh mi pakhat te a um hrih lai, cu mi cu Adam thu hla tawi asi. Sualnak thingkung cu Evi asi ih nun nak thingkung asi mi Nu Mary in a run thleng bang tuk in 1Cor 15:20-24 sung ah hitin a um, ''Minung ih hrang ah thih nak a um ih thih nak ih sin nun sal nak a um. Adam parih mi a zaten an thi bang in, mi zaten Khrih hrang ah an nung sal pei.'' Cu tiin Adam ai ah Jesuh Khrih in a run thleng thu khal cu theih fiang ter awk nak ah ka run bet mi te cu asi. Cu ruangah Nu Mary cu sual hram a neih lo a thian hlim thu cu fiang zet in kan thei thiam thlang ding tin zum nak tum pi ka nei asi, lung awi um ka ti nasa.
By Saya Cletus Hram Lian
Falam
