ZUMNAK
Duhdawtmi Pathian ih fa le pawl,
Zumnak timi cu ziangso asi ti kha ruat uhsi. Zumnak timi cu Pathian ih pekmi thluasuah asi. Pathian nih in pek lo ahcun a cuih zumnak rengreng tla kan co theilo ding asi.
Zumnak kan ti tikah Hebrew tongin “AMAN” timi le “BATAH” timi kom mi asi. “AMAN” cu Bible sungah “AMEN” tin leh sal asi ih a sullam cu “ka zum hnget” tinak asi. “Zum rori” tin tla an let theu. “BATAH” cu Pathian kha zum lawng si lo in “trust” timi zum ih rinsannak thawn asi. Cule, Pathian hnen ihsin a ratmi pohpoh kha fek zetin zum le Pathian ih tirhfial mi vekin tuah suak kha “Batah” tinak asi. Satan in Jesuh kha Pathian fapa asi tin a zum ko (Mk 1:24). Cumi cu “aman” tinak asi. (Lk 1:38) sungih Bawinu Mary in Pathian a zumih Pathian simmi vek cun ka parah cang ko seh tin a timi cu “batah” asi.
Zumnak timi cu veikhat kan ngah zo ruangah a hlo sal thei nawn lo mi, asiat thei dah lo mi thil asi lo. Kan fello ahcun a hlo sal thei mi asi. Zumnak timi cu kan tlak ruangah ngah thei mi tla asi lo. Pathian ih zaangfahnak thawn ngah thei mi asi. Theology kha ziang tlukin thiam hman sehla, thei hman sehla Pathian in zumnak apek lo ahcun “Zumtu” a si thei cuang lo.
Tui san ahhin kan zumnak ahcun “aman” lawng a tam hrih asi. Thil harsat, vansanglam thu le mangbang za paampi a thleng tikah kan zumnak camibuai cu kan sung ringring theu. Dam lo thu ruangah vaivuan in kan um ih “kutrin zohthiamtu hnenah, pol saya hnenah maw, thlacam thiam saya hnenah” kan va pan theu kha thil dik asi lo, kan zumnak hlikhlok tertu an si. “Pathian hrangah thi ka ngam, ka zumnak cu ka thlau ter lo ding” tiah kan ti ciamco, hla in kan sak ciamco theu nan damlo canah le hnatuan hlawhtling lo caan ahcun ol ai ten a sung kan pek theu asi lo maw. Kan zumnak cu “aman” dinhmun te lawng asi. Kan thlacamnak vekin kan ngah lo, Novena kan tuah ih thluasuah ngah lo vekin kan um, Mass ah thluasuah kan dilih kan ngah lo vekin a um theu tikah Pathian parah kan zumnak a tolh, a tum, a deem theu asi lo maw. Pathian khi ziangtinkimtitheih asi ti tla kan mang theu nawn lo asi lo maw?
Kan zumnak cu “batah” dinhmun ah kan khaisang a tul asi. Bawinu Mary in (Lk 1:38) “Bawipa, na sim mi vekin ka parah cang ko seh” tin tangdornak le Pathian zumih rinsannak thawn a sawn asi. Bawinu Mary in a nun sung hmuahhmuah ah Pathian kha number 1 ah si ter ringring theu. Hlanlai ih Igyip ram ih sal tlangval Joseph vekin siseh, Abraham vekin siseh zumnak ah pacang zetin ding ding kan si. Joseph ih a zumnak cu Pathian pakhat lawng tikha asi. Pathian parah zumtlak in a um ruangah Pathian in thluasuahnak a pekih “mang leh thiamtu” ah a cangih Igyipt ramah Phoroe siangpahrang sangtu ah a cang asi. Abraham cu Pathiam zum fektu asi vekin Pathian ih tirhfialmi vek cun a fapa “Isac” kha raithawinak ah sumnak a pek asi. Pathian ih dilmi asi mi cu zum fek zetin a pek asi. Daniel cu Pathian thu a hlon lo, Pathian parih a zumnak mak tarah a nei ti cu Nebuchanezzar singphahrang bawipa in a thei. Meisa sungin siseh, kiosa kut sungah in siseh a zumnak camibuai cu a awng ih Babylon ramah mifimbik ah a cang asi. Habakuk cu prophet pakhat asi ih Pathian parih zumnak a nei mi cu maktarah asi ve. Habakkuk 3:17 “Theipi in rah a nei lo ih sabit kuangin sabit a rah lo hman ah, Olif kuang in tla a rah an rah lo hman ah, lo in rawl a suak lo hman ah, tuu pawl an thih theh ih caw inn tla a lawng theh hman ah Pathian parah ka lung a awi thotho ding. Ziangahtile, Bawipa cu I runtu asi”. Olif cu siti hrangah asi. Sabitti cu tihaang hrangah asi. Tuu le caw cu meh hrangah a si. Lo rawl ahcun sangvut asi. Theipi cu ei ding, zuar ding, tangka ngahnak hrangah asi. Kan laitlang ah tihang kan hmang nan Israel ram ahcun sabit zuu lawng an hmang. Nunnak hrangih a ttul tuk mi pawl zianghman tang lo in cimit thluh hai sehla tla Habakkuk cu a poi lo ih Pathian kha a thangthat thei tho tho asi. Kannih sehla Pathian parah ngol in kan zumnak tla a hlo theh thei men. An zumnak pawl cu “batah” asi.
Zumnak kan nei mi kha check fel sal uhsi. “aman” dinhmun zumnak maw? Lo le, “batah” dinhmun ih zumnak maw tikha feltak in zoh sal uhsi. Thlacam uhsi. A dikmi Zumnak thluasuah kan nei thei ruangah Pathian hnenah tla lungawi thu sim uhsi.
Pa Pathian in amah parah “batah” dinhmun ih zumnak fekzen kan nei thei nak dingah in run + thluasuah hram seh. Amen.
